Feyk

Alyaskadagi sammitdan keyin Arnold Shvartsenegger Trampni “latta” va “Putinning kichkintoy muxlisi” deb atagani rostmi?

Donald Tramp va Vladimir Putin 2025-yil 15-avgust kuni Alyaskaning Ankoridj shahrida uchrashdi. Oradan ko‘p o‘tmay, ayrim blogerlar va internet foydalanuvchilari Shvartsenegger video murojaat yo‘llab, AQSh prezidentining sammitdagi xatti-harakatlarini haqoratli tarzda baholaganini iddao qila boshlashdi. Unga ko‘ra, aktyor Trampni “latta” va “Putinning kichkintoy muxlisi” deb atagan.

“Men doim o‘zimdan so‘rayman: qachon undan dastxat so‘raysiz yoki selfi tushishga taklif qilasiz?” — deya keltirildi aktyorning so‘zlari ko‘plab postlarda.

Telegram’dagi “Putin v Telegram” kanalida (mazkur tahlil yozilayotgan paytda 181 ming marta ko‘rilgan) qo‘shimcha qilib: “Bu Terminatorning Trampga qarshi birinchi hujumi emas. 2018-yilda Putin bilan uchrashuvdan keyin ham uni ‘kichkina qaynatilgan makaroncha’ deb atagandi”, deb yozildi. TGStat ma’lumotlariga ko‘ra, shu kabi postlar Telegram’da bir necha million marta ko‘rilgan.

Shvartseneggerning so‘zlariga javoban, Davlat Dumasi deputati Vitaliy Milonov uni “quruq, burishgan qariya” deb atadi.

Internetda aktyorning murojaatiga oid bir nechta versiya tarqaldi, ular asosan subtitrlarida farq qiladi. Runetda eng mashhur variantdagi tarjimada aktyor shunday deydi:

“Prezident Tramp, men sizning prezident Putin bilan bo‘lgan matbuot anjumaningizni endigina ko‘rdim va bu uyatli edi. Siz u yerda latta bo‘lib, muxlis boladek turdingiz. Men o‘zimdan doim shuni so‘radim: qachon undan dastxat so‘raysiz yoki selfi qilasiz? Siz bizning razvedkamizni, sud tizimimizni va eng yomoni, yurtimizni sotdingiz. Siz AQSh prezidenti bo‘lsangiz, bunday qilishingiz mumkin emas. Sizga nima bo‘ldi? So‘zning kuchi qayerda? Masalan, Ronald Reygan Berlin devori yonida turib: ‘Janob Gorbachyov, bu devorni qulat!’ degan paytdagi kabi. Hammasi qayerga ketdi?”

Bu tarjima aktyorning asl nutqiga mos keladi. Ammo u videoda “a little wet noodle” (to‘g‘ridan-to‘g‘ri tarjimada “kichkina ho‘l makaroncha”) degan ifodani ishlatadi. Bu rus tilida “latta” deb berilishi mumkin, ammo ayrim saytlar buni “kichkina qaynatilgan makaroncha” deb xato yozishgan. Bu ibora, ayrim OAVlar yozganidek, aktyorning Tramp haqida 2018-yilda aytgan so‘zlariga juda o‘xshaydi.

Ammo virusli rolikning asl manbasi topilsa, bu aslida bir xil murojaat ekani ayon bo‘ladi.

2018-yil 16-iyulda Xelsinkida Rossiya va AQSh sammiti bo‘lib o‘tgan. Bu Tramp prezident bo‘lganidan keyingi birinchi yirik uchrashuv edi. Oradan bir kun o‘tib, 17-iyulda Shvartsenegger o‘zining YouTube, Instagram va Facebook sahifalarida “Prezident Tramp, esda tuting: Amerika avvalo birinchi o‘rinda” nomli videoni joylagan. Aynan shu video 2025-yil avgustida tarqatilayotgan rolik bilan bir xil.

Amerika OAVlari yozishicha, Shvartseneggerning qahrli chiqishi Trampning matbuot anjumanida Rossiyani AQSh saylovlariga aralashganlikda oqlab, o‘z razvedka xizmati xulosalarini tanqid qilgani bilan bog‘liq edi. Tramp o‘shanda:

“Menga, ularning fikricha, bu Rossiya degan edi. Mana, hozir Putin yonimda turibdi, u bu Rossiya emasligini qat’iy aytdi. Men shunday deyman: bunga Rossiya sababchi bo‘lishi uchun hech qanday sabab ko‘rmayapman. Men o‘z razvedka xodimlarimga ishonaman, lekin Putin buni bugun qat’iy va ishonarli inkor etdi”, — degan edi.

Shvartseneggerning Putinning Alyaskaga tashrifi bilan bog‘liq holda Trampga murojaati esa aktyorning hech bir sahifasida topilmadi.

Xulosa: 2025-yilda tarqalgan Shvartseneggerning Tramp haqidagi videomurojaati haqiqiy, ammo u Alyaskadagi sammitdan keyin emas, balki 2018-yilda Xelsinkida bo‘lib o‘tgan AQSh–Rossiya uchrashuvidan so‘ng yozib olingan.

Oylik dayjestga obuna bo‘ling

Har oy eng muhim faktcheklar va feyklar haqida bitta qisqa xat. Spam yo‘q — obunani istalgan vaqtda bekor qilishingiz mumkin.

Xat tili:

Mavzuga oid

Oylik dayjestga obuna bo‘ling

Oyning eng muhim tekshiruvlari — har oy pochtangizda.