Fakt: Oʻzbekistonda kunlik va soatlik elektr isteʼmoli boʻyicha rekord yangilandi
Energetika vazirligi Oʻzbekistonda 13-iyun kuni kunlik va soatlik elektr isteʼmoli boʻyicha rekord yangilangani toʻgʻrisida xabar berdi.
Rasman bildirilishicha, 13-iyun kuni Oʻzbekistonda 231,7 mln kVt/soat elektr quvvati isteʼmol qilindi. “Bu miqdor iyun oyi uchun rekord koʻrsatkich hisoblanadi. Bundan bir yil muqaddam xuddi shu kuni 202 million kVt/soat elektr energiyasi ishlatilgan boʻlib, oʻsish koʻrsatkichi 14,7 foizni tashkil qilmoqda”, deyiladi bildiruvda.
Vazirlikning taʼkidlashicha, 14-iyun kuni soat 11:00 ga qadar soatlik ehtiyoj hajmi 11 080 MVtni tashkil qildi. Bu esa 2022-yilning 14-iyuniga nisbatan 1600 MVt (15,4 foiz) ga koʻpdir.
“Ushbu quvvat deyarli toʻrtta bugʻ-gaz qurilmasining yoki ikkita “Toʻraqoʻrgʻon” IESning quvvatiga teng. 14-iyunda sutkalik elektr energiyasi isteʼmoli 238-239 million kVt/soatga yetishi kutilyapti. Mazkur raqam 2022-yilning mos davrida qayd etilgan isteʼmol miqdoridan qariyb 30 million kVt/soat yoki 14,8 foiz koʻpdir”, deb bildirdi vazirlik.
Rasmiy maʼlumotda aytilishicha, 2022-yilning iyulidagi “eng anomal issiq haroratli davrda ham maksimal yuklama 10 800 MVtdan, sutkalik maksimal isteʼmol hajmi esa 238,2 million kVt/soatdan oshmagan edi”.
Vazirlik buning natijasida elektr tarmoqlari va transformator punktlarida yuklamalar ortishi, tarmoqda esa turli nosozliklar kelib chiqishidan ogohlantirdi.
