Google firibgarlikka qarshi kurashish uchun aqlli qo‘ng‘iroqlar tahlilchisini ishga tushirdi
Yangi tizim ilovalarning xatti-harakatlarini real vaqt rejimida tahlil qiladi.
Google kompaniyasi foydalanuvchilar xavfsizligini oshirgan holda ularning maxfiyligini ta’minlashga yordam beradigan yangi himoya funksiyalarini taqdim etdi. Asosiy yangiliklar qatoriga “Google Telefon” ilovasida “Firibgarlikni aniqlash” funksiyasi va real vaqt rejimidagi tahdidlarni aniqlaydigan “Google Play himoyasi” tizimi kiradi.
Sun’iy intellekt asosida ishlab chiqilgan “Firibgarlikni aniqlash” funksiyasi tobora murakkablashib borayotgan telefon orqali firibgarlikdan himoyalanishga yordam beradi. Ushbu funksiya suhbat xarakterini tahlil qilib, potensial firibgarlik alomatlarini, masalan, bank hisobidagi muammo bahonasida tezda pul o‘tkazishni so‘rash kabi holatlarni aniqlaydi. Firibgarlik gumoni aniqlanganda, foydalanuvchiga ovozli signal, tebranish va vizual ogohlantirish yuboriladi. Ushbu tizim faqat qurilmaning o‘zida ishlaydi va ma’lumotlar Google serverlariga saqlanmaydi yoki uzatilmaydi. Funksiyani sozlash foydalanuvchining to‘liq nazorati ostida bo‘lib, uni istalgan vaqtda o‘chirish mumkin.
“Firibgarlikni aniqlash” funksiyasi AQShda Pixel 6 va undan yangi modellarda, ingliz tilida ishlaydi. Funksiya asosida ilg‘or sun’iy intellekt moduli Gemini Nano yotadi, u allaqachon Pixel 9 seriyasidagi qurilmalarda qo‘llanilmoqda.
Yana bir yangi funksionallik – “Google Play himoyasi” doirasida real vaqt rejimida tahdidlarni aniqlash tizimidir. Bu tizim ilovalarning xatti-harakatlarini, jumladan, ularning ruxsatnomalar va boshqa xizmatlar bilan o‘zaro aloqalarini tahlil qilib, potensial zararli dasturlarni topadi. Agar ilovada zararli faoliyat aniqlansa, foydalanuvchi darhol xabar oladi va tezkor chora ko‘rishi mumkin. Birinchi bosqichda ushbu funksiya foydalanuvchidan ruxsatsiz maxfiy ma’lumotlarni to‘plashi mumkin bo‘lgan kuzatuv dasturlarini aniqlashga yo‘naltiriladi.
Barcha ma’lumotlar qurilma ichida, Private Compute Core orqali qayta ishlanadi, bu esa ma’lumotlarning yig‘ilishi va uzatilishini istisno qiladi. Tahdidlarni aniqlash funksiyasi Pixel 6 va undan yuqori qurilmalarda mavjud bo‘lib, asta-sekin boshqa Android qurilmalariga ham tarqatiladi.
Ushbu yangiliklar Google’ning foydalanuvchilar xavfsizligini ta’minlagan holda ularning maxfiyligini himoya qiladigan texnologiyalarni ishlab chiqishga intilishini yana bir bor tasdiqlaydi.
